تکایه‌ ئه‌م کتێبه‌ داچێنن(1)

ریچارد براتیگان

و. له‌ ئینگلیزییه‌وه‌: به‌یان عه‌زیزی

گوڵه‌ خۆڕسکه‌کانی کالیفۆرنیا

له‌م به‌هاری1968دا

کاتێ ئه‌م سی ساڵه‌ی دوایی ئه‌م سه‌ده‌

سه‌فه‌ر ئه‌کا وه‌ک خه‌ونێک و

کۆتایی پێدێ

کاتی داچه‌ندنی ئه‌م کتێبه‌یه‌

بۆ ئه‌وه‌ی دایبچێنی

دوایی ره‌نگه‌

له‌ لاپه‌ڕه‌کانی ئه‌م کتێبه‌

 گوڵ و گیا و سه‌وزه‌

شین ببێ!

شاستا ده‌یزی

دۆعا ئه‌که‌م

ئا له‌م سی ودووساڵه‌ی ماوه

گوڵ و سه‌وزه‌ و گیاکان

 سه‌ره‌تای سه‌ده‌ی بیسته‌م

ئاو به‌ن به‌ ده‌نگی خۆیان

ئه‌وه‌ش بگێڕنه‌وه‌

کاتی خۆی ئه‌وان تاقه‌ کتێبێک بوون

به‌ ده‌ستانێکی عاشق سپێردرانه‌ ژیان.

 کالێندولا(گوڵی هه‌میشه‌ به‌هار)

هاوڕێکانم بێ ئوقره‌ن و

له‌گه‌ڵ منا باسی هه‌ندێ شت ئه‌که‌ن

له‌باره‌ی ئاخری دنیاوه‌ ئه‌دوێن، تاریکایی و غه‌زه‌ب

زۆر جارئارام گوێیان لێئه‌گرم

دوایی ئه‌ڵێم:

نا بڕیار نییه‌ ته‌واو بێت

ئه‌مه‌ ته‌نیا سه‌ره‌تایه‌که‌

 رێک وه‌ک ئه‌م کتێبه‌ که‌ ته‌نیا سه‌ره‌تایه‌که‌.

فه‌رشی شایانه‌ی سونبولی شیرین

من بڕیارم داوه‌ له‌ دنیایه‌کا بژیم

له‌وێ کتێبه‌کان ببنه‌ هه‌زاران باخ و

منداڵه‌کان له‌و باخانه‌دا یاری بکه‌ن و

فێری ڕێگه‌ ناسکه‌کانی

سه‌وز بوون و گه‌شه‌ی شته‌کان ببن.

 که‌ره‌وز

سپاسی ئێنێرژی ئه‌که‌م

سپاسی خوا و شانۆی مێژوو

که‌ له‌ مێژه‌ ئێمه‌ی هێناوه‌ بۆ ئێره‌

به‌م کتێبانه‌ی به‌ ده‌ستمانه‌وه‌یه‌

وه‌ک داهاتوویه‌ک هاوار ئه‌که‌ین

له‌ خواره‌وه‌ی دۆڵێکی سه‌وز و پڕ ئه‌ستێره‌.

 کووله‌که‌

ئێستا رێک کاتی ئه‌وه‌یه‌

ڕسته‌کان پێکه‌وه‌ تێکه‌ڵ که‌ین

ڕسته‌کان له‌گه‌ڵ خاکا

 و نوخته‌کان له‌گه‌ڵ هه‌تاوا

باران له‌گه‌ڵ کرده دا

کرمه‌کان له‌ " ؟"کان ئه‌هاڵێن!

کاتی ئه‌وه‌یه‌ ئه‌ستێره‌کان بدره‌وشێن له‌ ناوه‌کانا و

شه‌ونم بنیشێته‌ سه‌ر پاراگرافه‌کان!

 گێزه‌ر

بیر ئه‌که‌مه‌وه‌ به‌هاری 1968

کاتێکی باشه‌ سه‌یری خوێنمان که‌ین و بزانین

دڵیشمان له‌کوێ لێئه‌دا

وه‌ک ئه‌م گوڵ و سه‌وزانه‌

که‌ هه‌موو رۆژێک سه‌یری دڵیان ئه‌که‌ن

سه‌یری هه‌تاو ئه‌که‌ن

هه‌موو رۆژێک وه‌ک ئاوێنه‌یه‌کی گه‌وره‌

 حه‌ز و زه‌وقی ئه‌وان بۆ ژیان و

 بۆ جوان بوون ئه‌نوێنێته‌وه‌.

کاهوو

ته‌نیا هیوایه‌تێک ئێمه‌ هه‌مانه‌

منداڵه‌کانمانن و

ئه‌و تۆیانه‌ی ئه‌یانده‌ینێ و

ئه‌و باخانه‌ی پێکه‌وه‌ ئه‌یانچێنین.

ئه‌و ده‌قه‌ی له‌ پشت پاکه‌ته‌ تۆوه‌کاندا نووسراوه‌:

پۆلێنکراوه‌ بۆ 1968 - 1969

گوڵه‌ خۆڕسکه‌کانی کالیفۆرنیا

تۆوه‌کان ڕاسته‌وخۆ له‌ عه‌رزا داچێنن له‌ شوێنێکی به‌ر بڵاو و له‌ خاکێکی باشدا که‌ بۆ په‌روه‌رده‌کردنی گیا شیاوه‌. پاش ئه‌م قۆناغه‌ مه‌ترسیی سه‌رمابرده‌ییان نامێنێ. له‌ ناوچه‌ کوێستانییه‌کاندا باشتره له‌ پاییزدا بچێندرێن. تۆوه‌کان له‌گه‌ڵ چه‌ند قه‌رای خۆیان خاکدا تێکه‌ڵ بکه‌ن و بیانچێنن. وا باشتره‌ له‌ شوێنێکی بڵاو و خۆرگردا بێت، ئه‌وکات هه‌مووو تۆوه‌کان به‌ هێمنی داپۆشن. ئاگادار بن زۆرتر له‌1/8 ئینچ نه‌بێت. پاشان قایم خاکه‌که‌ بته‌پێننه‌وه‌. کاتێ جوان سه‌ریان هه‌ڵێنا به‌ مه‌ودای 6 ئینچ ده‌ور و پشتیان به‌ تاڵ بکه‌ن . قه‌ره‌باڵغی ئه‌بێته‌ هۆی ئه‌وه‌ی گیاکان باش گه‌شه‌ نه‌که‌ن. به‌رده‌وام ئاوپرژێنی خاکه‌که‌ بکه‌ن و نماوی ڕایگرن تا ئه‌و کاته‌ی گیاکان باش گه‌وره‌ ئه‌بن. ئه‌گه‌ر ئیزن بده‌ن بمێننه‌وه‌ و ئاگادارییان بکه‌ن ئه‌م گیایانه‌ ساڵ له‌ دوای ساڵ به‌رهه‌م ئه‌ده‌نه‌وه‌.

(1) ئه‌م ده‌قانه‌ کۆی به‌رهه‌مه‌ شیعرێکی ریچارد براتیگانه‌ که‌ شیعره‌کان له‌سه‌ر چه‌ند پاکه‌تی تۆی گوڵ و گیا نووسرابوون و هه‌ر پاکه‌تێک شیعر و تۆی گیایه‌کی تێدا بوو. وه‌رگێڕ

سه‌رچاوه‌:

www.brautigan.net