شه‌و

سه‌ید قادر هیدایه‌تی

هوبووت

ئه‌و کاتانه‌ی خه‌یام ده‌خوێنییه‌وه‌ ، له‌ قه‌فی سمێڵت ده‌گه‌ڕێی زۆر بێ ، شۆڕشۆڕ تاکوو وای لێبێ بتوانی جۆلانێیه‌کی لێ هه‌ڵبه‌ستی . لێی هه‌ڵده‌به‌ستی .

له‌ ژووره‌که‌تدا خه‌وتووی .

 له‌ پڕ بانگت ده‌که‌ن .

هه‌را ده‌که‌ی : کێ بوو؟

ده‌نگ نابیستی .

سه‌رت له‌ په‌نجه‌ره‌که‌وه‌ ده‌کێشییه‌ ده‌رێ : کێ بوو؟

که‌س نابینی .

بۆ ئه‌وه‌ی باشتر بڕوانی،  ملت درێژ ده‌که‌ی‌ ، درێژ درێژ به‌ قه‌ت دارێک . دارێک بۆ هه‌قلی مه‌قۆ .

به‌ منداڵی وه‌ختێک له‌ به‌ر ئاوێنه‌ ڕاده‌وه‌ستای وه‌ها له‌ ئاوێنه‌که‌ ده‌چوویه‌ پێشێ ، چاوتان له‌ چاوی یه‌ک و گلێنه‌تان له‌ گلێنه‌ی یه‌ک ده‌درا . چاوت له‌ ڕه‌شه‌وه‌ ده‌هات. بیرێکی قووڵ و تاریک . ده‌کشایه‌وه‌ دواوه‌ . چه‌مۆله‌یه‌کت لێ ده‌نا چه‌مۆڵه‌ و ئاوێنه‌ ئاوێته‌ی یه‌ک ده‌بوون. سه‌رت له‌ گێژه‌وه‌ ده‌هات خلۆر ده‌بوویه‌وه‌ نێو تاریکاییه‌کی به‌سام ...

ته‌نیا که‌وتوویه‌وه‌ . هه‌موو له‌ چینی دیوارێکدا سه‌ریان پێکه‌وه‌ ناوه‌ و تۆ له‌ بیرت د‌ێ دایکت ده‌یکوت "به‌ردی خڕ له‌ هیچ دیوارێکدا گیر نابێ "؟

له هیچ دیوارێکدا گیر نابی و‌ له‌ جۆلانێ و هه‌قلی مه‌قۆش به‌ر ده‌بییه‌وه‌ خوارێ ...

 

 

  شاده‌ و ئیمان

له‌ ژووره‌که‌تدا ڕاکشاوی . پێت خۆشه‌ سه‌رماوقولانجێک بده‌ی . ته‌ق ،ته‌ق له‌ شووشه‌ی په‌نجه‌ره‌که‌ت ده‌ده‌ن . ده‌ڵێی نه‌ بات دیوه‌ و نه‌ بۆران . باوه‌ڕ ناکه‌ی که‌س ده‌ستی بگاته‌ ئه‌و په‌نجه‌ره‌یه‌ .

"گوێـم زرینگاوه‌ته‌وه‌ "

دێی سه‌رماوقولانجه‌که‌ت بده‌ی ، ته‌ق ، ته‌ق له‌ شووشه‌ی په‌نجه‌ره‌که‌ت ده‌ده‌نه‌وه‌ .

"له‌م سێ نهۆمه‌ش له‌ کۆڵم نابنه‌وه‌"

دێته‌وه‌ بیرت : " دێن بانگم ده‌که‌ن تاکوو له‌ گه‌ڵیان بچمه‌ ده‌ره‌وه‌ی شار . به‌ زۆری گۆرانیم پێ ده‌ڵێن  تاکوو پێی هه‌ڵپه‌ڕن و که‌یفی پێ بکه‌ن . تا گۆرانیم پێ ده‌ڵێن گۆرانیم پێ ده‌ڵێن و له‌وه‌ولا به‌ هه‌موویان شوێنم ده‌که‌ون : ئاوێنه‌ له‌ من چه‌مۆڵه‌ له‌ تۆ . ئاوێنه ‌له‌ من چه‌مۆڵه‌ له‌ تۆ ..."

ته‌ق ، ته‌ق له‌ شووشه‌ی په‌نجه‌ره‌که‌ت ده‌ده‌نه‌وه‌ .

بێجگه‌ له‌وان کێ ئه‌وه‌نده‌ حوجه‌ ده‌ستی بگاته‌ ئه‌و په‌نجه‌ره‌ بڵینده‌ ؟"

دێی به‌ په‌له‌ بچی دوو چه‌مۆڵه‌ له‌ سه‌ر شووشه‌ی په‌نجه‌ره‌ی دیوه‌که‌ت بکێشییه‌وه‌ ، تاکوو به‌شکم له‌ کۆڵت بنه‌وه‌ و ده‌ست به‌ردارت بن .

سه‌ر هه‌ڵدێنی و یه‌ک به‌خۆت داده‌چڵه‌کێی : شه‌و ده‌بینی .

شه‌و ده‌بینی ئه‌مجاره‌یان بێ راسپارده‌ و نێردراو ، بۆ خۆی هاتووه‌ . ده‌یهه‌وێ بێ شه‌رت و شۆ قامکت هه‌ڵێنی و ده‌مت داچه‌قێنی و ئیمانی پێ بێنی: فڕی فڕی ڕۆژ فڕی فڕی فڕی ڕۆژ فڕی فڕی فڕی ڕۆژ فڕی فڕی فڕی ڕۆژ فڕی فڕی فڕی ڕۆژ فڕی فڕی فڕی ڕۆژ فڕی فڕی ڕۆژ فڕی و له‌ حاڵێكدا که‌ قامکت هه‌ر به‌ حه‌واوه‌ و ده‌مت داچه‌قاندبێ‌ خه‌وت لێ بکه‌وێ و ئه‌ویش به‌ ئیشتیای خۆی ...

له‌ پڕێکدا بروسکه‌یه‌ک به‌ گیانتدا دێ و به‌ دڵتدا دێ : "ئه‌رێ بۆ بیر له‌ زه‌رده‌ی خۆراوا نه‌که‌مه‌وه‌؟"

هه‌ڵده‌ستی دوو به‌رد به‌ ده‌سته‌وه‌ ده‌گری و له‌ په‌ستا به‌رده‌کان له‌یه‌ک ده‌ده‌ی :"هه‌ی ته‌خته‌ ته‌خته‌ ته‌خته‌ ئێواره‌یه‌ و بێ وه‌خته‌ ..."

بانگ ده‌دا ...

 

 

قیامه‌ت

ئاڵبۆمه‌که‌ت دێنی ته‌ماشای وێنه‌ی له‌ داردانی خۆت ده‌که‌ی . له‌ سه‌ر داری هه‌قلی مه‌قۆوه‌ سه‌رت له‌ بن میچی وێنه‌که‌ توند بووه‌ و لاقه‌کانت شۆڕ بوونه‌وه‌ خوارێ .

 دوو چه‌مۆڵه‌ له‌ سه‌ر قوڵکایی چاوت کێشراونه‌ته‌وه‌ و گلێنه‌کانت ده‌رپه‌ڕیون . په‌تی دار وه‌ها له‌ ملت توند بووه‌ ده‌ڵێی هه‌زار ساڵ ته‌نیا پێچی خواردووه‌ و پێچی خواردووه‌ هه‌تا گه‌یشتۆته‌ ملت ...

هه‌ڵده‌ستی ژووره‌که‌ت وه‌به‌ر شه‌پ ده‌ده‌ی . داری به‌ سه‌ر به‌رد و به‌ردی به‌ سه‌ر داره‌وه‌ ناهێڵێ...

به‌ په‌تی جۆلانێ ، داری هه‌قلی مه‌قۆکه‌ له‌ په‌نجه‌ره‌که‌وه‌ شۆڕ ده‌که‌یه‌وه‌ خوارێ .

دوو چه‌مۆڵه‌ش له‌ سه‌ر شووشه‌ی په‌نجه‌ره‌که‌ت ده‌کێشییه‌وه‌ ...

۱۳۷۷-۱۳۷۵ 

 خه‌ڵوه‌تخانه‌ ؛ شه‌ونووسی سه‌یدقادر هیدایه‌تی